15 сакавіка - Дзень Канстытуцыі Рэспублікі Беларусь
Штогод 15 сакавіка адзначаецца Дзень Канстытуцыі Рэспублікі Беларусь. Канстытуцыя з'яўляецца Асноўным Законам нашай дзяржавы, на яе аснове фармуецца ўся сістэма заканадаўства, у ёй вызначаецца кампетэнцыя дзяржаўных органаў.
Беларуская Канстытуцыя гарантуе кожнаму грамадзяніну свабоды і правы, неабходныя для стваральнай працы, дастойнага жыцця і гарманічнага ўсебаковага развіцця асобы.
Канстытуцыя Рэспублікі Беларусь была зацверджана 15 сакавіка 1994 года на 13-й сесіі Вярхоўнага Савета Рэспублікі Беларусь 12-га склікання і з'яўляецца першай у гісторыі суверэннай дзяржавы і пятай па ліку Канстытуцыяй Беларусі, прынятай пасля Кастрычніцкай рэвалюцыі 1917 года. Канстытуцыя дзейнічае са зменамі і дапаўненнямі, прынятымі на рэспубліканскіх рэферэндумах 24 лістапада 1996 года, 17 кастрычніка 2004 года, 27 лютага 2022 года.
27 лютага 2022 года прайшоў рэспубліканскі рэферэндум па пытанні ўнясення змен і дапаўненняў у Канстытуцыю Рэспублікі Беларусь. За ўнясенне дапаўненняў і змяненняў прагаласавалі больш за 80% выбаршчыкаў, якія прыйшлі на рэферэндум. Сімвалічна, што змены ў тэкст Асноўнага Закона ўступаюць у сілу менавіта ў Дзень Канстытуцыі - 15 сакавіка 2022 года.
Адметнымі рысамі Асноўнага Закона Рэспублікі Беларусь з'яўляюцца палітычны плюралізм, замацаванне ў якасці эканамічнай асновы разнастайнасці форм уласнасці; устанаўленне роўнасці дзяржавы і грамадзяніна, наяўнасць у іх узаемных абавязацельстваў; замацаванне ў якасці вектара для развіцця бягучага заканадаўства прыярытэту агульнапрызнаных прынцыпаў міжнароднага права; вяршэнства права; падзел і ўзаемадзеянне ўладаў; прамы характар дзеяння норм Канстытуцыі. Вышэйшай каштоўнасцю Асноўны Закон Рэспублікі Беларусь аб'яўляе чалавека, яго жыццё.
Традыцыйна напярэдадні і ў Дзень Канстытуцыі ў нашай краіне праходзіць Усебеларуская патрыятычная акцыя "Мы - грамадзяне Беларусі!". Сёлета запланавана больш за 150 уручэнняў пашпартоў чатырнаццацігадовым юнакам і дзяўчатам, пераможцам алімпіяд, выдатнікам вучобы, актывістам БРСМ і БРПА ва ўсіх абласцях і Мінску.
Паводле слоў Аляксандры Ганчаровай, сакратара Цэнтральнага камітэта БРСМ, акрамя цырымоніі ўручэння, плануецца правядзенне шэрагу інтэрактыўных праектаў, анлайн-квестаў, круглых сталоў па абмеркаванні новай рэдакцыі Асноўнага Закона краіны. Акрамя таго, юнакам будзе ўручана новая рэдакцыя Канстытуцыі і флаг Рэспублікі Беларусь.
